فضايح الحريم سري للغاية

من المعروف أن المرأة تقدر تتحمل آلام ما يتحملها أقوى الرجال وهذا الشي مو جديد عليها ومعروف لدى الجميع

بس الجديد هو اللي بقولكم
ذاك اليوم قريت مقاله ورد فيها عباره تقول:
(( المرأة تتحمل الآلام من اجل جمالها))

وقفت عند هالعباره كثير
وحبيت اني أخوض فيها مع مجتمعنا النسائي
لقيتها صحيحه مليون في الميه

يعني الكعب اللي يلبسونه الحريم وكما يسمونه (( الشوكه )) من اسمه يروع
هذا الكعب الله يسلمكم أتحدى رجال يمشي فيه متر واحد والله اني استغرب بعض الأحيان الوحده تلبسه وتروح مناسبه ولما ترجع وتفصخه تقول كنها أسير توهم فاكينه تقعد تتشكى وآآآآآآآي يارجلى يا ظهري ومقدر أحركه وحاله (( طيب وش اللي مخلينا نلبسه ))؟؟

أنا أقولكم ليش عشان تطلع طويله
باختصار عشان تطلع أحلى...!!!؟؟

صارت مناسبه والبنت تبي تروحها لبست وكشخت وما لقت جزمه (( الله يكرمكم )) تناسب الفستان وش تسوي لازم تلبس شي يناسب تروح تحوس عند اخواتها او وحده تمون عليها تلقى جزمه مناسبه للفستان بس ماهى على المقاس تتعاند
إلا بتلبسها (( تذكرني بخوات سندريلا ))
وأخيرا قدرت تحشرها برجلها
وراحت المناسبه
والمسكينه رجعت ورجلينها وارمه ومحمره
الله كل هذا عشان الكشخه والموضه
عشان تطلع اجمل وأحلى..!؟؟

بعض البنات تلتهب إذنهم من الحلق واذا طلعو مكان لازم يلبسون حلق ولازم نفس لون اللبس ومايمدي المسكينه ترجع إلا على طول تفصخه هذا إن ما شالته بالسياره ثم تغسل مكانه بمويه بارده وتحط كريم وحاله

كل هذا عشان تطلع أحلى..!؟؟

وفيه حلق نازل قبل فتره يكون طويل أو حلقه كبيره
وفي حلقات كبار ما تتحملها الإذن البشريه
يعني يالله إذنين فيل عشان تناسب حجمه
لاحد يستغرب من اللي يلبسونها خطر تقطع إذنهم

يتحملونها عشان الموضة
عشان يطلعون أحلى..!؟؟


العدسات الملونة ما تناسب عيون الجميع بعضهم يلبسونها وعيونهم محمره وتدمع وتوجعها بس الضعيفه مقاومه ومتحمله

عشان تطلع أحلى...!!؟؟

ولا التسريحات بالعروس حدث ولا حرج يمكن البعض ماقد شاف درازن التوك والبنسات المدعسه في هالتسريحات يعني لو وحده تجيها خبطه على راسها يمكن ينخرم من البلاوي اللي تحت التسريحه وبعض التسريحات ثقيله ومليانه اكسسوارت وبعضها يوجع الراس ويكون مشدد

طيب ليش نستحمل هذا العذاب

عشان نطلع أحلى...؟؟؟


والبعض ما يتحمل الشدو أو الظل والكحل لأن عينه حساسه ويحطونه وعيونهم توجعهم وترجع البنت وتحط وأنواع القطرات وغسول العين من البلاوي اللي حطتها طيب ليش تحطها وعينها ما تتحمل...!!؟؟

عشان تطلع أحلى..!!؟؟


بعض الحريم تبي تلبس فستان ضيق والكرشه ماتساعد ابد تروح تلبس مشد
الاسترش بختلاف انواعه ولا يخفى على الجميع ما يسببه ذالك المشد من آلام.. يعني ذولا اللي يلبسونه حتى ما يعرفون ياخذون نفس منه ويمكن ما يتعشون حدهم الشاهي

مافي أمل الفستان بينشق

كل هذا عشان تطلع أحلى....؟؟!!



والبعض نفس الشي تنانيرهم ضيقه مره السحاب شوي بينقطع تلقاهم اذا جو يتعشون فكو السحاب عشان تدخل اللقمه

ياحرام ليش...!!؟؟

عشان تطلع أكشخ وأحلى..!!؟


ولا الميك أب وما أدراك ما التلطخ والتلحوس!!؟

طبقات على خشة الوحده والله حتى ريحته تكتم كريم واساس وطبقات وبودره

كل هذا عشان تطلع فاتنه

يعنى عشان تطلع أحلى..!!؟؟


ولا الوحده اذا طولت أظافيرها تحسبونها مرتاحه فيها تكذب عليكم لو تقول إنها مرتاحه

وتتحمل البنت عشان المناكير والموضة والحركات

عشان يعني اني مااشتغل ولا اسوي شي
وتطلع أحلى...!!؟؟


ولا فيه شي يقهر ويطفش مثل التشقير .. انواع الروائح اللى صادره منه الخايسه مثل التنر او صابغ دربزين ولا معتق غرفه

وياعمري تستحمل
عشان تصير اجمل واحلى

وانا اشهد والله